Rekordtidleg sesongstart for turorientering
Av Kristian den 10.03.08
Årets turorientering startar tidelegare enn nokosinne, søndag 16. mars. Dette bildet er frå ein av dei vakre tur-dagane i juni i fjor.
Dermed blir det tidlegaste sesongopning nokonsinne, to veker tidlegare enn i fjor, seier leiar i Orienteringslaget, Thomas Førde.
Fire ulike kart
Han legg til at denne sesongen kan Sveio o-.lag tilby tur-o-postar i fire ulike terreng slik at fire ulike kart blir nytta.
Dei nyaste orienterings-karta i Sveio O-lag si eiga, Auklandshamn og Lier blir nytta. Det same gjer to litt eldre kart, Sveio Vest og Valestrand. I alt 52 postar blir spreidde over desse karta over to omgangar slik som tidlegare.
Eige tilbod for barn
I tillegg til den store tur-o-pakken for heile familien, tilbyr Sveio O-lag også ”mini-turorientering” eller nærtrim tilpassa barn og familiar som ikkje prøvd turorientering tidlegare. Dette tilbodet er samtidig eit tilbod om nærtrim for dei som vil prøva turorientering i ei mindre og enklare utgåve.
Særskilte kart med meir tydelege detaljar er laga i nære turområde ved Førde og Auklandshamn. Her blir lagt ut til saman ti postar i kvar omgang, postar som er lettare å finna for barn og som samtidig gir ei fin turoppleving for vaksne.
Spesialpakken med turorientering for barn kan kjøpast på dei same utsalsstadene som den vanlege tur-o-konvolutten.
Ny turbrosjyre
Litt lenger ut på våren kjem Sveio O-lag med ei flunkande ny tur-brosjyre. Seks faste turar, som inngår i det landsomfattande opplegget kalla, Vital-turen, blir beskrive i brosjyra som forutan tekst innheld bilde og kart over enklaste ruter til og frå postane. Desse postane skal stå ute heile året. Registrering på postene skjer ved hjelp av mobiltelefonen.